Sugbuanon hopeful sa American Idol 10!

CEBU, Philippines - Nagkagubot ug gibati og tumang kahinam ang mga Sugbuanon tungod sa pagkalakip sa tubong Cebu ug tiunay nga Sugbuanon nga si Monique delos Santos sa labing sikat nga reality show sa tibuok kalibutan, ang American Idol.

Samtang nagkagubot ang nasud nga Pilipinhon sa pagkasulod sa Pinay nga si Thia Mejia, daghan ang naghudyaka kagahapon dihang napagya nga ang anak sa sikat nga Cebuana diva, Eva delos Santos, nga kanhi bokalista sa Zee Band, lakip pud diay sa nasulod aron padayon makigtigi didto sa Hollywood pagkakaron.

Sa segment nga “Road To Hollywood” mapasigarbuhon nga gipamulong ni Monique nga gikan siya sa “Cebu, Philippines,” ug kasamtangang nanimuyo sa Seattle.

Ang iyang mga ginikanan matud pa ang iyang mga inspirasyon ug idolo, samtang iyang gibutyag nga siete anyos pa lamang siya dihang nagsugod siya og kanta.

Drawing, poetry, ug songwriting ang iyang mga talento. Karong tuiga matud pa siya nanimpad sa American Idol tungod kay paminaw niya karon na ang tukmang higayon aron tumanon ang iyang pangandoy, duyog usab sa suporta sa iyang pamilya.

Gibutyag pud niya sa maong video interview nga si Tim Urban sa Season 9 maoy iyang crush.

Samtang pinaagi sa totallycebu.com nasayran nga naka-release na og album si Monique kaniadtong 2009 pinaagi sa Polyeast Records.

Nagdala siya sa ngan nga Monique Rae, ug ang iyang debut album nag-ulohan og “All Up To Me.”

Tinun-an siya sa Cebu International School, nahimongh bida sa musical nga Oliver; nalakip isip usa sa mga hosts sa Sabado Na Gyud sa ABS-CBN Cebu; ug midaog sa VJ Hunt sa Studio 23 suma pa sa http://totallycebu.com.

Marian ug Sid gyud ang magpares

Kumpirmado na nga si Sid Lucero gyud ang main leading man ni Marian Rivera sa umaabot nga epicserye sa GMA-7, ang Amaya. Ang tsika, wala mag-agi og audition si Sid, kundili gitanyagan gyud siya sa GMA-7. Ang lain pang leading man ni Marian mao ang professional model nga si Mikael Daez.

Kapusong Manny gihapon

Sa Mayo pa matapos ang kontrata ni Manny Pacquiao sa GMA-7, pero mipirma na siyang daan og bag-ong kontrata. Kapuso lang gihapon siya.

Dennis magpabilin pud

Karong adlawa, February 18, gitakda nga mupirma og tulo na pud ka tuig nga kontrata sa GMA-7 si Dennis Trillo.

Dili mangilog og eksena

Walay plano si Janice de Belen nga mutambong sa kasal ni Priscilla Mereilles ug sa iyang kanhi bana nga si John Estrada karong February 26. Dili buot si Janice nga mayagaw ang kasal gumikan sa iyang presensya.

TV5 News Channel ilusad

Kung ang Kapuso Network dunay GMA News Channel nga ilusad karong February 27, ang Kapatid Network o TV5, duna puy Aksyon TV. Ilusad ang maong news channel sa TV5 karong Lunes, February 21, diin makita matud pa kini sa Cebu ug Davao pinaagi sa Channel 29.

Nagpasikat

Gikagubtan karon ang usa ka video sa Chinese actress/model nga si Lulu Gan gumikan kay gipakita siya nga nag-shower samtang walay sapot.

Ang nakaliki niini kay mismong inahan matud pa ni Lulu ang mikuha sa video ug nag-upload niini sa YouTube.

Gani ang inahan ni Lulu sa video nga namahayag nga gihimo nila kini kay desperada na sila nga makabaton og boyfriend ang actress/model sanglit 26 anyos na ang dalaga ug walay uyab.

Pero dunay miingon nga ganahan lang gyud musikat si Lulu maong nakigkumbuya kini sa iyang inahan alang sa maong nude video.