Gibraltar ang Rayna Venezuela, Puerto Rico ug Pilipinas wa manimaho

CEBU, Philippines - Si Miss Gibraltar, Kaiane Aldorino maoy gikoronahan nga ika “59th Miss World 2009” nga gipahigayon niadtong Disyembre 12 sa alas singko sa hapon  (kagahapon sa kaadlawon oras dinhi sa Pilipinas) didto sa Gallagher Convention Center, Johannesburg, South Africa.  Ang Gibraltar nahisakop sa Europa.

Si Kaiane Aldorino, 23 anyos ug may gitas-on nga 5’9, mipilde sa 111 ka mga kandidata sa tibuok kalibutan. Si Miss Mexico, Perla Beltran maoy nahimong 1st-Runner-Up ug si Miss South Africa, Tatum Kishwar, milandig sa  2nd Runner-Up.  Kauban sa “Top 7 Finalists”  uban sa tulo ka mga mananaug mao sila si Miss Canada, Lena Ma; Miss Colombia, Daniela Ramos; Miss France, Chloe Mortaud ug si Miss Panama, Nadege Herrera.             

Samtang si Miss Brazil, Luciana Bertolini; Miss India, Pooja Chopra; Miss Japan  Eruza Sasaki; Miss Kazakhstan, Dina Nuraliyeva; Miss Korea, Kim Joo-ri; Miss Martinique, Ingrid Littre; Miss Sierra Leone, Mariatu Kargbo; Miss Poland, Anna Jamroz ug si Miss Vietnam, Tran Thi Hurong Giang ang mikompleto sa Top 16 Semi-Finalists. 

Sa nagsingabot pa lamang ang pageant napili ang “fast-track winners”  nga sila si Miss Japan, Eruza Sasaki, isip Miss Sports; Miss Gibraltar, Kaiane Aldorino isip Miss World Beach Beauty; ug nagtabla sila si Miss Sierra Leone, Mariatu Kargbo ug si Miss Canada, Lena Ma, isip Misses Talent; samtang si Miss Mexico, Perla Beltran maoy Miss Model of the World.

Si Miss India, Pooja Chopra maoy midaug sa  katapusang “fast track event”, ang “Miss World Beauty with a Purpose award” nga  gipahibawo  sa “finals night” kauban ni Miss Guatemala, Alida Boer, ug Miss Barbados, Leah Marville.

Si Miss Philippines Mary Ann Umali, ang pambato sa Pilipinas,  minghoy na pod ang dagway kay wala gyud manimaho sa maong indigay sa kaanyag.

Sa gipahigayong “awarding” sa “coronation ball” human sa maong pasundayag, ang mga napiling “ Continental Queens of Beauties” mao si Miss Vietnam, Tran Thi Hurong Giang maoy “Queen of Asia and Oceania”, samtang si Miss Gibraltar, Kaiane Aldorino, maoy “Queen of Europe”; Miss Mexico, Perla Beltran, “Queen of Americas”; Miss South Africa, Tatum Keshwar, “Queen of Africa”; ug si Miss Puerto Rico, Jennifer Colon, “Queen of Caribbean”.

Ang maka-pakugang nga detalye mao nga wala masulod isip finalists ang mga pambato sa Venezuela ug Puerto Rico.