Early Favorites: Usa gyud kaha nila ma-rayna?

CEBU, Philippines - Karong Agosto 23, pa mahitabo didto sa Bahamas ang Miss Universe 2009 pageant, apan karon pa lang nagkainit na ang nahisgutang indigay, ilabi na sa pagsugod na og pangabot sa nagkadaiyang mga kandidata gikan sa lain-laing mga nasud tibuok kalibutan. Karon pa lang nagbaha na sa nagkadaiyang pageant forums and sites ang mga panagna kinsay molangkat sa korona, matag usa dunay manok nga gisuportahan.

Unang adlaw kagahapon sa kalihukan sa maong indigay mao ang “Arrival ug Registration” sa mga nagsingabot nga mga 84 ka mga lain-laing maanyag nga mga babaye sa tibuok kalibutan. Gani ang organisasyon ug mga opisyales sa maong kompetisyon ingon man ang mga empleyado sa Bahamas airport nangandam na gayod sa ilang pag-abot alang sa maong kompetisyon.

Si Miss France 2009, Chloe Mortaud maoy unang maanyag nga kandidata nga miabot sa airport sa Bahamas. Siya maoy “early bird” sa tanang 84 ka mga kandidata sa tibuok kalibutan. Gisugat siya ug gi-abi-abi ni Miss Bahamas 2009, Kiara Sherman, mga miyembro sa press, photographers ug mga opisyales sa Bahamas dayon deretso sa Nassau hotel. Misunod dayon si Miss Canada 2009, Mariana Valente ug si Miss Thailand 2009, Chutima Durongdej. Pero sa ilang paghiabot sa Bahamas airport, nagpahigayon una sila sa pagpa-rehistro ug pag-pose alang sa pictorial.

Pero gikahinaman ang pag-abot didto sa giisip nga “early favorites” nga sila si Miss Venezuela 2009, Stefania Fernandez; Miss Dominican Republic 2009, Ada dela Cruz; Miss Mexico 2009, Carla Carrillo; Miss Spain 2009, Estibaliz Pereira; Miss Australia 2009, Rachael Finch, ug Miss USA 2009 Kristen Dalton.

Usa gyud kaha nila ang pabiling magbarog sa gabii sa koronasyon ug maoy makaangkon sa “Diamond Nexus Labs” nga korona ug maoy mahimong “successor” ni Miss Universe 2008 Dayana Mendoza?

Samtang ang atong pambato nga si Binibining Pilipinas Universe 2009, Pamela Bianca Manalo maoy usa sad ka paborito ug gani mi-rank 5 sa “People’s choice” ug rank 14 sa “internet polls judging” sa www. missosology.org.