Katrina Halili: Pagbangon gikan sa pagkadusmo

CEBU, Philippines – Niadtong Domingo sa artikulo, Katrina Halili: Whispers Candidly, sa Banat Hugyaw, gipaambitan sa kontrobersyal nga aktres nga bisan pag-abot na niya dinhi sa Sugbo isip celebrity guest sa Gaisano Main and Countrymall Shop For Scholarship raffle promo, gikulbaan gihapon siya ug nakapangutana sa iyang kaugalingon nganong midawat siya sa maong out of town show. Pero iya usab nga giangkon nga kinahanglan na niya nga makigbisog.

Gidetalye usab niya nga Valentina role sa Pinoy classic nga Darna sa GMA-7 ang unang offer nga mao untay mamahimo niyang comeback project human sa kontrobersiya, apan mas gipili niya ang papel nga Fedra sa nagsugod na nga teleseryeng Rosalinda kagabii, tungod kay dili siya buot nga makitang dunay mga kaubang “ahas.”

Kagahapon sa second part nga giulohan og Katrina Halili: ‘Ayaw Ko Na” iyang gibanhaw ang ilang relasyon ni Dr. Hayden Kho Jr; gilakbitan pod niya nga tinuod ang iyang gugma ngadto sa doctor ug nga dili siya makaingon nga wala na siyay gugma ngadto niini, pero dili na gyud siya. Giasoy usab niya nga nakugang gyud siya nga dunay sex video nga migawas busa mangita siya og hustisya kalabot niini.

Karong adlawa sa pagtapos na niining three-part series atong saw-an ang leksyon nga nakat-onan ni Katrina sa kontrobersiya, ang nagpadayong negosasyon alang sa tulo ka posibling product endorsements ug ang mga eksena sa mainitong paghangop sa mga Sugbuanon kaniya niadtong Sabado sa gabii.