Gretchen 'di kasali sa pagkikita-kita ng pamilya
Abalang-abala ngayon si Konsehal Marjorie Barretto sa pag-aasikaso sa mga detalye ng gaganaping 50th wedding anniversary ng kanilang mga magulang.
Sa November 23 ang selebrasyon na gaganapin sa Fernwood Garden, ikakasal uli sina daddy Mike at mommy Inday Barretto, kaya hindi simpleng party lang ang magaganap.
Madalas naming kausap si mommy Inday, kahit hindi siya palalabas ng bahay ay walang nakaliligtas na kuwentong-showbiz sa kanya, alam na alam niya ang mga nangyayari sa mundong ginagalawan ng kanyang mga anak.
Siya ang klase ng nanay na kapag napapagitna sa kontrobersiya ang anak ay tahimik lang na nagdaramdam. Hindi siya puwedeng tawaging stage mother dahil hindi siya mahilig umeksena.
Naglalabas din siya ng saloobin, ipinagtatanggol niya siyempre ang kanyang mga anak, pero bihirang-bihira lang siyang humaharap sa camera para mainterbyu.
Regular silang nagkikita-kita nina Claudine at Marjorie. Sila na ang pinupuntahan ng mga ito, hindi tulad noong mabilis pa silang kumilos ni daddy Mike na silang mag-asawa ang dumadalaw sa bahay ng kanilang mga anak.
Siguro’y may nagtatanong sa kanilang isip ngayon, bakit sina Claudine at Marjorie lang ang binanggit namin, samantalang meron pa silang Gretchen ni daddy Mike?
Basta, alam naming mahal na mahal ni mommy Inday ang kanyang mga anak at mahal din siya ng mga ito, kasali na si Gretchen.
* * *
Nakauwi na sa kanilang mansiyon sa Imus, Cavite si dating Senador Ramon Revilla, Sr. Magdadalawang buwan ding na-confine sa St. Luke’s Medical Center ang aktor-pulitiko pero ngayon ay maayus-ayos na ang kanyang kalagayan.
Dun dumadalaw ngayon ang magkakapatid na Revilla, halos araw-araw silang dumadalaw sa kanilang ama, kahit gaano pa katrapik ang pagpunta sa kanilang bahay sa Cavite ay hindi hadlang yun sa kanilang pagbisita kay Tito Ramon.
Hindi lang dahil sa hinahanap sila ng matandang Revilla, talagang ganun kamaasikaso sa kanilang ama ang magkakapatid. May kani-kanyang schedule nga sila sa pagbabantay sa ospital noon pero ang nangyayari ay sabay-sabay pa rin silang nandun para makasama ang kanilang ama.
“Nung una po, nandun kaming lahat, pero halos hindi naman kami umiimik. Yun po ang time na nasa ICU pa ang daddy ko, lahat kami, nag-aalala sa situation niya.
“Pero nung umayos na ang condition niya, nagkukuwentuhan na kami, meron nang mga nagsasalita, hindi na kasi kami masyadong tensiyonado sa kalagayan ni daddy,” kuwento ni Princess Revilla.
Hanggang ngayon ay hindi pa rin masyadong naigagalaw ng dating senador ang kaliwang bahagi ng kanyang katawan. Meron naman itong therapist, pero napakalaki ng nagagawang pag-aalaga sa kanya ni dating Senador Robert Jaworski.
“Si Kuya Sonny ang tumututok sa kanya, alam kasi niya yun, talagang regularly, siya ang nag-aasikaso kay daddy,” kuwento naman ni Marlon Bautista.
Malayo ang Rizal sa Cavite, pero ang mag-asawang Governor Junjun Ynares at Andeng ay hindi nakalilimot dumalaw, sa ganung aspeto kapuri-puri ang magkakapatid, magkakatulong sila sa lahat ng bagay.
Dahil marami itong trabaho ay may mga panahong wala sa tabi ng kanyang ama si Senador Bong Revilla, pero hindi ito nagpapabaya kasi panay-panay ang pagtse-check nito.
Mapapaaga ang paggaling ng dating senador dahil sa dami ng nagmamahal sa kanya, ang klase ng pagmamahal na ganun ang gamot na hindi nabibili sa kahit saang botika.
- Latest