Radioke Singing Challenge Aninaw sa duha ka mga habig

Nainsulto ug dismayado. Kini maoy nabatyagan sa mga ginikanan sa tulo sa lima ka mga grand finalists sa gipahigayong, “Radioke Singing Challenge,” diha sa SM Entertainment Plaza ug gipasiugdahan sa estasyon dyAR niadtong Miyerkules sa hapon. Apan giklaro sa mga ginikanan sa mga bata nga grand finalists nga wala sila mag-question sa resulta sa maong tigi kun dili ang matud pagka “walay delicadeza” sa mga nagduma niini. Paminaw nila, gipaboran nang daan sa mga nagduma sa maong contest ang migawas nga mananaug.

“We are not questioning the decision of the judges. You should never do that. We are questioning the way it was handled,” nagkanayon si Ed Cortez, amahan sa usa sa mga contestants nga si Dawn, kinsa lakip sa mga mibisita sa Banat Hugyaw niadtong Miyerkules sa gabii human gyud dayon sa contest.

Sa pikas bahin gihimakak sa station manager nga si Benjie Cantalan nga duna silay gipaboran. Matud pa niya ngadto sa Banat Hugyaw, walay pagmao-mao nga nahitabo tungod kay dili sila buot nga mabulingan ang imahe sa contest ilabi na nga unang higayon kini nga gihimo dinhi sa Sugbu.

Apan si Cortez, miingon nga nainsulto silang mga ginikanan tungod kay sa sinugdanan pa lang usa sa mga “staff” sa nahisgutang estasyon suod na kaayong daan sa mananaug ug gani paminaw nila mao pay nagdala sa nahisgutan aron mosalmot sa maong singing contest. Si Dawn ug ang lain pang finalist nga si Samantha Abadilla mga mananaug sa Little Big Star Cebu ug matud pa ni Cortez nga bisan og kaila na nilang daan ang mga nagpadagan sa maong contest sa ABS-CBN wala gyud kini nila ipakita sa publiko ang ilang kasuod o panaghigala tungod kay maikod sila sa ubang mga contestants. Ang gipasabot nga staff giila lang nga si Mike.

Lahi matud pa ang ilang nasinati sa nahisgutang contest. Si Mike matud pa magsige og duol-duol sa mga hurado ug sa kampo sa mananaug. Dugang pa niini duna pa silay mga nadunggan nga panag-istorya tali ni Mike ug sa winner nga  si Morisette Amon sayong bahin sa contest.

Nasayran nga sa ikatulong semana sa kompetisyon napildi si Morisette ni Danielle Ozaraga, nga taga Danao, City.  Pagkasunod semana ang migawas nga mananaug mao na ang anak ni Cortez nga si Dawn. Niadtong tungora milugwa usab sa estasyonan si Morisette. Ang weekly finals sa maong contest gipahigayonan sa radio station lang. Didto na matud pa nagsugod ang nabantayan sa mga ginikanan, ang ilang gitawag nga “ maneuvering.” Giasoy ni Cortez ngadto sa Banat Hugyaw nga nakadungog siya ni Mike nga nagkanayon ngadto ni Morisette  nga “pagbutihan mo ha, mapapahiya tayo niyan kay Sir Phil” (Philogene Florita, Chairman of the Board of Judges atol sa grand finals). Kini tungod kay makigtigi og balik si Morisette alang sa wild card edition, diin siya maoy midaog.

Niadtong Miyerkules sa gabii usab mitug-an ngadto sa Banat Hugyaw si Rose Merry Cajes, laing grand finalist, nga nadunggan niya si Mike nga nagkanayon ngadto ni Morisette, “Morisette naa koy amigo sa judges, lalaki nga nag-yellow (Phil). Ikaw maoy modaug ingon ang judges.”Ni Mike matud pa nga nag-tagalog. Niadtong tungora mao pay pagkahuman og kanta ni Morisette isip contestant number two.

Ang inahan usab ni Samantha, si Marissa nagkanayon nga kadto pa siya nakasugat og singing contest nga gitugtan nga magkapareha og kanta ang mga finalists. Suma pa niya nga dihang gipangutana ang management nagkanayon kini nga wala silay patakaran nga ingon niini busa ang resulta nagpareha og contest piece si Morisette ug Samantha, “And I’m Telling You.” Gidugang ni Marissa nga angay unta nga si Morisette maoy mo-give way tungod kay mas una man si Samantha nga nahimong grand finalist apan nagkanayon matud pa ang kampo niini nga dili mosugot ang management nga mag-ilis siya og kanta.

Si Cortez usab miingon nga wala na gyud unta silay plano nga moapil pa sa mao nga contest tungod usab sa tambag sa ABS-CBN nga dili maayo nga magpataka og salmot ang iyang anak. Apan niya pa nanindotan sila sa gipagya sa organizer nga pa-contest kadto sa usa ka bag-o nga FM station diin ang mananaug himoong recording artist sa Manila. Uwahi na niya pa dihang ilang nasabtan nga amateur singing contest gyud kadto ug sanglit nahinayak na man sila wala na sila moatras aron dili mahulagway nga “unprofessional.” Nasayran nga P10, 000 ang giingong first prize apan katunga ra sa maong kantidad ang matud pa nadawat sa winner.

Not True

Samtang si Florita nga nahinabi sa Banat Hugyaw kagahapon nagkanayon nga wala siya masayod nganong nahisgotan ang iyang ngalan ni Mike.  Iyang giklaro usab dili si Morisette ang iyang choice.

“ She (Morisette) was not even my choice. In fact she came as close second pero duha pa gyud sila. Lahi lahi man gyud ang choice sa judges kay puros man maayo,” nagkanayon si Florita.

Suma pa niya sikit kaayo ang scoring ni Samantha ug Morisette busa mitambag siya nga tan-awon og balik ang ranking apan mao ra gihapon ang migawas nga resulta—si Morisette ug Samantha ang close fight.

Dinhi na niya pa mitumaw ang ‘deliberation” tali sa lima ka judges. “Number 2 (Morisette) was the choice kung gahapon nga performance ang hisgutan,” nagkanayon si Florita. “I was not impressed with her (Samantha) performance yesterday (Wednesday) kay dry, which I found out later nga nasakit diay siya so affected iyang voice. Morisette has more star quality, naay problema ang iyang tingog pero sige lang ma-polish pa na.”

Sa pikas bahin, nagkanayon si Marissa nga wala silay problema sa resulta. “ Wala man gyud koy problema ana kay natural ra mana nga basta contest naay modaug, naay mapildi.”

Technical maneuvering?

Kagahapon sa hapon nakig-atubang og balik sa Banat Hugyaw ang mga ginikanan sa upat ka finalists. Ang amahan ni Cajes nga si Jose miingon nga nahibong siya nganong pagkanta sa iyang anak “ mi-backfire” ang mircrophone. Gidugang pa niya nga sa wala pa si Cajes mikanta nakita niya si Mike nga dunay giliso liso sa sound system.

Si Dawn mireklamo nga hinay kaayo ang iyang microphone ug kusog ang audio. Misamot kini og kahinay dihang nagkataas na ang tono sa iyang kanta. Ang mga inahan nila ni Danielle ug Samantha nahibong usab nganong karat ang microphone samtang ang mga nahisgutan mikanta.

Samtang si Marissa miingon nga duna siya’y higala nga nagkanayon nga si Mike matud pa talent manager ni Morisette ug konektado sa marketing department sa estasyon.

Ang mga ginikanan nagkanayon nga buot lamang nila nga mohimo og pakisusi ang management aron mahatagan og katin-awan ang tanan.

Freelancer

“Mike is not duly connected with the station. He is a freelancer for marketing. He is not a talent manager. He was there because of the advertisers,” pagklaro ni Cantalan ngadto sa Banat Hugyaw.

Suma pa niya dili usab tinuod nga ilang gipaboran si Morisette. “It’s not true. I’m the station  manager, I oversee everything kasi ayaw namin na matainted ang image ng contest. We had a meeting with Salonga (nag-provide sa sound system), I had meeting with the marketing of  SM, kasi we don’t want loopholes.Wala gyud mi ana. We are not manipulating the results. Even the judges could prove that, lima baya mi (judges) kabuok,” pong pa ni Cantalan.

Matud niya kung ang technical aspect usab sa contest ang hisgutan imposibli usab niya pa nga motumaw ang sitwasyon. “ The sound engineer was there. Lahat guarded yan from the tabulation in the computer, everything; kasi pinindotan talaga kami ng Manila office. Walang problema sa mic sa junior(division), senior lang kasi lowbat yung microphone ng emcee. Pero performance was not affected,” niya pa.