24-oras curfew sa loob ng 14-araw, ipapatupad sa isang lugar sa Muntinlupa
MANILA, Philippines — Upang mapigilan ang pagtaas ng bilang ng kaso ng coronavirus disease (COVID-19) isinailalim sa 24-oras na curfew sa loob ng 14 na araw ang Southville 3 sa Brgy. Poblacion, Muntinlupa City.
Simula ngayong Sabado Hulyo 4 hanggang sa Hulyo 17, tatagal ang paghihigpit sa curfew sa nasabing lugar na isa sa pinakamalaking komunidad na nasasakop ng Brgy. Poblacion.
Batay ito sa nilagdaang Resolution 29-series of 2020 ni Brgy. Poblacion Captain Allen Ampaya na magpapatupad ng 24-hour curfew sa Southville 3, National Housing Authority (NHA).
Sa loob ng dalawang linggo o 14 na araw, ang mga residente ng lugar ay hindi maaaring lumabas ng kanilang mga bahay maliban lang kung may emergency cases o essential travel.
Exempted naman sa curfew ang mga bibili ng essential goods at nagtatrabaho sa mga industriyang pinapayagang mag-operate sa ilalim ng general community quarantine (GCQ).
Nang mailagay na sa General Community Quarantine (GCQ) kung saan mas maluwag ang curfew, naging triple ang kaso ng COVID-19 na mula sa 9 ay naging 27 na sa loob lang ng 15 araw.
Nilinaw naman ng Punong Barangay na hindi lockdown kundi paghihigpit lang sa mga residente na limitahan ang galaw at pakiki-pag-halubilo sa labas ang ipapatupad.
- Latest