Pacquiao nagsimula nang mag-ensayo
MANILA, Philippines — Bagama’t wala pang katiyakan kung tuloy na ang paghahamon niya kay WBA welterweight king Lucas Matthysse ng Argentina ay sinimulan na ni Manny Pacquiao ang kanyang pagpapakondisyon.
Sa katunayan ay nagdya-jogging na ang Filipino world eight-division champion tuwing umaga sa labas ng kanyang mansyon sa Forbes Park sa Makati City.
“Jog, walk, jog walk lang muna,” sabi ni Pacquiao sa panayam ng ABS-CBN News. “Siguro sa April mag-start na ako ng training. Ngayon stamina muna para pagdating mo sa gym ay hindi ka manibago.”
Itinakda ng MP Promotions ni Pacquiao (59-7-2, 38 KOs) ang kanilang salpukan ni Matthysse (39-4-0, 36 KOs) sa Hunyo 24 sa Kuala Lumpur, Malaysia.
Hindi kasama si Bob Arum ng Top Rank Promotions sa naturang boxing event.
“I haven’t been handling that deal. They’ve been handling that deal themselves,” wika ni Arum sa naunang panayam ng BoxingScene.com. "Hopefully the money, in the form of a deposit, turns up."
Tinanggihan ni Pacquiao ang paglalagay sa kanilang laban ni Mexican world light welterweight titlist Mike Alvarado (38-4-0, 26 KOs) sa undercard ng ikalawang pagdedepensa ni Jeff Horn (18-0-1, 11 KOs) sa kanyang WBO welterweight title laban kay American mandatory challenger Terence Crawford (32-0-0, 23 KOs) sa Abril 14 sa Mandalay Bay.
- Latest
