NBA finals na lakers batok Heat

CEBU, Philippines — Sugdan na sa haring gangis sa Western Conference nga Los Angeles Lakers ug kampiyon sa East nga Miami Heat ang giatngan nilang "best-of-seven" NBA Finals karong alas-9 sa buntag didto sa Orlando, Florida.

Seguradong huego todo nga kumbati ug pinaksitay ang ipabuhagay sa Lakers ug Heat gumikan kay pareho man nga gutom ang duha ka mga koponan og kampiyonato.

Ang Lakers ubos sa pagpangu ni LeBron James, mitaak sa NBA Finals sa labing unang higayon sud sa usa ka dekada human gipang-ihaw ang Portland Trail Blazers, Houston Rockets ug Denver Nuggets,  samtang ang Heat miabante sa unang higayon sukad niadtong 2014 human gipalagpot ang Indiana Pacers, Milwaukee Bucks ug Boston Celtics.

Katapusan nakampiyon ang Lakers niadto pang 2010 ubos sa pagpangu ni Kobe Bryant nga maoy gibayaw nga Finals MVP, samtang ang Heat naghari sa liga sud sa duha ka sunod-sunod nga higayon niadtong 2012 ug 2013 ubos sa liderato ni James nga mao na karon ang labing lig-ong pambato sa Lakers.

Katumpang ang laing superstar nga si Anthony Davis, si James ug ang Lakers inilog kaayo sa tapad, apan dili sila angayan nga mokompiyansa kay bisan tuod og gagmay, apan hait og labok ang Heat ubos ni Fil-Am coach Eric Spoelstra nga mas beterano sa kampiyonato kon itandi ni Lakers coach Frank Vogel.

Banggaon nilang James ug Davis sa Lakers mao ang dekalibre sab nga kombinasyon nilang Jimmy Butler ug Bam Adebayo sa Heat.

Lain pang saligan sa Heat ang star rookie niining si Tyler Herro ug ingon man sila Goran Dragic,  Duncan Robinson, Jae Crowder, Andre Iguodala Solomon Hill ug Kelly Olynyk.

Samtang gawas nilang James ug Davis, lauman sa Lakers sila si Rajon Rondo, Danny Green, Kentavious Cadwell-Pope, Kyle Kuzma,  Dwight Howard ug Alex Caruso.