Heat naghari sa East: Miabante sa NBA Finals batok Lakers

CEBU, Philippines — Nanginit ang Miami Heat sa katapusang kuwarter aron pakagingon ang Boston Celtics sa Game 6 sa iskor nga 125-113, ingon man langkaton ang NBA Eastern Conference title kagahapon didto sa Orlando, Florida,

Gihuman sa Heat ang best-of-seven series sa baraha nga 4-2 aron pag-abante niini sa NBA Finals sa ikaunom  nga higayon sa kasaysayan sa ilang prangkisa.

Ang Heat nga nakampiyon niadtong 2006, 2012 ug 2013 makigsangka sunod batok sa Western Conference champion Los Angeles Lakers sa NBA Finals nga sugdan karong Miyerkules sa gabii (Huwebes sa buntag oras dinhi sa Pilipinas).

Si Bam Adebayo miiskor og 32 puntos ug 14 ka rebounds alang sa Heat nga biya og sayes puntos sa nahibilin nga 9:18 sa duwa.

Apan ang Heat mipahungaw sa ilang kainit ug wala na molingi pa sukad nailog ang labaw sa iskor nga 101-100 human sa three-point play ni Adebayo sa nahibiling sayes minutos sa aksiyon.

Misamot pa ang kainit sa Heat hinungdan nga ilang gilubong ang Celtics og 14 puntos sa iskor nga 116-102 sa katapusang dos minutos.

Misalida sab si Jimmy Butler nga miduslit og 22 puntos ug walo ka assists, samtang si rookie Tyler Herro mipupo og 11 sa iyang 19 puntos sa naghaguros nga ratsada sa Heat sa katapusang kuwarter. Sila si Duncan Robinson ug Andre Iguodala dunay 15 puntos matag usa, samtang si Goran Dragic midugang og 13 puntos sa nagmaya nga Miami.