Kahon na may laman na mga ulo ng tao, ninakaw sa Denver, Colorado!
ISANG kahon na naglalaman ng mga pugot na ulo ng tao ang ninakaw sa nakaparadang freight company truck sa Denver, Colorado, U.S.A.
Ayon sa ulat ng CBS Denver, nilooban ang delivery truck habang nakaparada ito sa East Denver Central Park noong nakaraang Huwebes (Marso 3).
Inakala ng mga awtoridad na isa lamang petty theft ang pangyayari ngunit nang malaman nila na mga ulo ang laman ng ninakaw na kahon, naglunsad na sila nang malawakang imbestigasyon.
Napag-alaman na ang ninakaw na kahon ay may malaking label na nagsasabing “Exempt Human Specimen” na ang ibig sabihin ay gagamitin sa medical research ang nilalamang human body parts nito. Dahil dito, may haka-haka ang mga awtoridad na ang kahon talaga ang pakay ng mga magnanakaw.
Sa kasalukuyan, wala pang naaaresto sa kasong ito at patuloy pa sa pag-iimbestiga ang mga awtoridad upang mahuli ang mga magnanakaw at ma-recover ang mga ninakaw na ulo.
- Latest