Aso sa Canada, nanganak ng kulay berdeng tuta!
HINDI makapaniwala ang mag-asawa mula sa Nova Scotia, Canada nang mapansin nila na ang isa sa mga tuta na ipinanganak ng kanilang bulldog ay kulay berde!
Sa panayam sa mag-asawang sina Trevor at Audra Mosher, pinakahuling iniluwal ng kanilang bulldog na si Freya ang kulay berdeng tuta.
Sa akalang namamalikmata lamang sila, agad nilang nilinis ang tuta ngunit lalong tumingkad ang pagiging kulay berde nito. Sa pangamba na may sakit ang tuta, nag-search sila sa Google gamit ang mga salitang: “my puppy is green, what’s wrong?”
Sa tulong ng internet, napag-alaman ng mag-asawang Mosher na isang pambihirang pangyayari na maging kulay berde ang isang bagong panganak na tuta at walang dulot na panganib ito sa kanyang kalusugan.
Ayon sa mga beterinaryo, ang rare discoloration na ito ay nangyayari kapag na-expose ang tuta sa green pigments ng apdo ng kanilang ina habang nasa sinapupunan pa lamang ito.
Hindi panghabambuhay ang pagiging berde ng tuta sapagkat kukupas din ang kulay nito habang lumalaki.
Dahil sa kakaiba nitong kulay, pinagpipilian ng mag-asawang Mosher ang mga pangalan na Pistachio, Wasabi, Hulkette at Lucky Irish.
- Latest