GCQ giit pa sa MM!
Anumang araw ay maglalabas na muli nang anunsyo ang Pangulong Digong tungkol sa quarantine classifications na ipapatupad partikular sa NCR at mga karatig na lalawigan.
Kasalukuyan pa ring nasa general community quarantine (GCQ) ang NCR at kalapit lalawigan hanggang bukas.
Hindi lang malaman kung tuluyan na itong maluluwagan at mananatili sa kasalukuyang classification.
Pero kung ang independent OCTA Research Group ang tatanungin, irerekomenda nila sa pamahalaan na panatilihin pa rin ang umiiral na GCQ hanggang katapusan ng Hulyo dahil sa nanatili pa rin ang banta ng COVID-19 lalo na ang Delta variant.
Kung sabagay, napagsasabay naman sa ilalim ng GCQ ang bahagyang kaluwagan at pagbubukas pa ng mas maraming negosyo.
Kung tutuusin nga halos nasasanay na sa ganito ang marami nating kababayan, pero kahit papaano para sa kanila ito na ang new normal.
Kung ang OCTA, hanggang katapusan ng Hulyo ang rekomendasyon na GCQ, may ilan nga na ang rekomendasyon ay panatilihin ang GCQ hanggang sa katapusan ng taon, para lalong makatiyak na hindi na mauulit ang matinding pagtaas ng kaso ng COVID na sinasabayan pa nga nang puspusang pagbabakuna.
Ang kailangan na lang talaga eh ang mapanatili pa rin ang istriktong health protocols para tuluyang umayos ang sitwasyon.
Baka nga naman kapag binigla ang pagluluwag, may pagsisihan pa dahil marami pa rin ang pasaway na sobra ang kumpiyansa at nagpapabaya na sa mga sarili sa pagsunod sa safety protocols.
Sana nga ay magtuluy-tuloy na ang pagbaba ng COVID at tuluyan nang matamo sa mga susunod na buwan ang herd immunity dahil sa malawakang pagbabakuna.
Pero laging isipin ‘wag magpakasiguro kahit nga marami na ang bakunado, matinding pag-iingat pa rin ang kailangan sa kasalukuyan.
- Latest
