Lalaki sa India, inaresto matapos paliparin ang alagang aso gamit ang mga lobo!

DAHIL sa kagustuhan na makapag-post ng kakaibang content sa kanyang Youtube channel, isang lalaki sa New Delhi, India ang nagpalipad ng kanyang aso sa pamamagitan ng pagtali nito sa balloons!

Tinuligsa ng Indian netizens ang Youtube video ni Gaurav Sharma, 32, kung saan nakita na itinali niya ang alagang Pomeranian na si Dollar sa 10 balloons.

Habang lumilipad sa ere si Dollar, kitang-kita na humampas ito sa isang balkonahe ng isang apartment kaya agad itong sinagip ng babaing nakatira roon.

Matinding pangba-bash ang natanggap ni Sharma mula sa mga netizens kaya agad niyang binura ang video sa kanyang Youtube channel na may mahigit 4 million subscribers.

Dahil sa ginawa niya sa kanyang aso, naghain ng police complaint ang animal rights group na People for Animals na naging dahilan para siya’y arestuhin.

Sa kasalukuyan, nakapaghain na ng piyansa si Sharma at naglabas siya ng public apology sa kanyang mga social media accounts.