Lalaki sa Australia, may natagpuang ahas sa letsugas na nabili niya sa supermarket!
GALING sa ALDI supermarket sa Sydney si Alex White at kanyang asawa. Agad kinuha ni Alex ang letsugas mula sa kanyang shopping bag para hugasan at gagawa sila ng salad.
Pero nagulat siya nang makitang may kumikislot na matabang bulate sa loob ng plastic wrapper nito.
Lalo siyang nagulat nang malaman na hindi bulate ang kumikislot kundi isang ahas!
Sigurado siyang ahas sapagkat inilabas nito ang mapulang dila!
Sinabi niya sa kanyang misis na may ahas sa nabili nilang letsugas kaya pinagtulungan nila itong ikinulong sa isang plastic food container saka tumawag sila sa WIRES, isang animal rescue organization na tumutulong humuli ng mga nakawalang hayop.
Mabilis na rumesponde ang WIRES at napag-alaman na ang natagpuang ahas sa letsugas ay isang Pale-headed snake na may habang walong pulgada.
Kilala ang Pale-headed snake na makamandag at ka-yang pumatay ng tao sa isang tuklaw lamang.
Walang balak magsasampa ng reklamo si Alex White at ang kanyang misis sa ALDI, ang supermarket chain kung saan niya nabili ang letsugas, dahil wala namang naperwisyo sa kanyang pamilya.
Ipinangako naman ng pamunuan ng ALDI na iimbestigahan nila kung paano nagkaroon ng ahas ang kanilang itinitindang gulay at mas hihigpitan nila ang pag-iinspeksyon sa kanilang mga paninda.
- Latest
