12-anyos na batang lalaki sa U.S., pinagsabay tapusin ang high school at college!

HABANG ang karamihan sa buong mundo noong 2020 ay naka-lockdown at walang magawa sa kanilang mga tahanan, naisipan ng 12-year-old na si Mike Wimmer na mag-enroll online sa isang community college habang tinatapos ang kanyang high school diploma sa online classes.

Fast forward ngayong May 2021, ga-graduate na si Wimmer hindi lamang sa high school, kundi pati na rin sa kolehiyo!

Dahil sa mataas na IQ, nakumpleto ni Wimmer sa loob lamang ng isang school year ang apat na taon ng pag-aaral: grade 11 at grade 12 sa high school at ang two-year associate’s degree sa kolehiyo.

Sa edad na 12, nakapagtatag na si Wimmer ng isang tech startup company. Ito ay ang Reflect Social na ang hangarin ay gawing simple ang paggamit ng smart home appliances sa tulong ng social media platforms upang mas ma-ging madali ang mga gawaing bahay

Ang startup company na ito ang dahilan kaya napahanga at pinahintulutan siya ng Rowan Cabarrus Community College na kumuha ng associate’s degree kahit kasalukuyan pa niyang tinatapos ang kanyang high school diploma.

Magmamartsa si Wimmer sa Rowan Cabarrus Community College sa May 21 at sa Concord Academy High school sa May 28 kung saan siya ang valedictorian.