Pagbubukas ng ilang negosyo, isabay sa pagpapatupad ng MECQ
Nagdesisyon na si Pangulong Digong, pinalawig pa ang modified enhanced community quarantine (MECQ) sa NCR Plus mula Mayo 1-14.
Base na rin kasi ito sa mga ginawang rekomendasyon ng iba’t ibang grupo, health experts at ahensya kasama na ang DOH.
May matindi pa kasing pangangailangan para panatilihin ang MECQ, upang mapigilan pa ang pagtaas ng kaso nang nagkaka-COVID.
Pero sa kabila nito, nais na rin ng ilan na kahit bahagya eh magbukas ang negosyo.
Sa naging rekomendasyon nga ng Metro Manila mayors, nais nila ang ‘Hybrid MECQ’.
Kabilang na rin dito ang pagpapaiksi sa curfew para mabigyang daan ang ilang negosyo na tumakbo.
Maging ang DTI, hangad din na kasabay sa ekstensyon ng MECQ unti -unti na ring makabalik sa operasyon ng ilang negosyo kabilang ang mga salon, barberya at indoor dining.
Kung mapagbibigyan ang kanilang rekomendasyon na 10% capacity sa indoor dinning ng mga restaurant at 50% capacity sa mga personal care services, nasa kalahating milyon displaced workers ang makakabalik sa trabaho.
Hindi lang marahil nakikita ng iba na sa pagpapatupad ng istriktong quarantine o ECQ na pinairal mula Marso 29 hanggang Abril 12 na sinundan naman ng MECQ, nasa 1.5 milyong manggawa pala ang nawalan ng hanapbuhay sa NCR Plus.
Kaya giit na rin ng MM mayors maging flexible , maipatupad man ang MECQ hanggang Mayo 14. Sana ay mapayagan na rin kahit unti-unti na makabukas ang ilang negosyo at trabaho para na rin sa nalulugmok nang ekonomiya.
- Latest