May bisa ba ang kasalan kung sa Internet gagawin?

Dear Attorney,

Nagpaplano na po kaming magpakasal ng nobya ko ngunit dahil sa pandemya ay tanggap na namin na hindi kami makakapagdaos nang malaking pagtitipon. Plano po namin na online na lang ganapin ang kasal. May bisa po ba ang kasalan namin kung sa Internet lamang at sa pamamagitan lamang ng mga teleconferencing apps katulad ng Zoom ito gaganapin? —Randy

Dear Randy,

Nakasaad sa Family Code na ang isa sa requirements upang magkaroon ng bisa ang isang kasalan ay ang pagkakaroon ng isang marriage ceremony kung saan haharap ang mga ikakasal sa solemnizing officer katulad ng pari, mayor, o huwes. Sa nasabing seremonya nila idedeklara, sa harap ng hindi bababa sa dalawang saksi, ang pagtanggap nila sa isa’t isa bilang mag-asawa.

Base sa nabanggit, malinaw na hindi magkakaroon ng bisa ang isang kasalan kung hindi ito isasagawa ng personal. Aktwal na pagharap sa magkakasal ang nakasaad sa batas kaya hindi maaring idaos ang kasalan sa pamamagitan ng mga makabagong apps ngayon katulad ng Zoom na ginagamit para sa mga online meetings.

Maaring gawin na ang mga malalapit na kaibigan at kamag-anak na lamang ninyo ang manood ng kasal n’yo online ngunit kayong dalawang ikakasal at ang mga magiging saksi ninyo ay kailangang personal na humarap sa magkakasal sa inyo.

Mahirap talagang magdaos ng mga pagtitipon ngayon ngunit hindi basta-basta ang requirement na hinihingi ng batas para magkaroon ng bisa ang isang kasal. Kung sakaling isagawa online ang isang kasal at walang naging personal na pagharap sa solemnizing officer ay siguradong walang bisa ito at pagmumulan pa ng iba’t ibang legal na isyu at problema.