Kasal sa India, isinagawa sa ilalim ng tubig!

KAKAIBANG social distancing ang ipinatupad sa isang kasal sa India matapos itong idaos 60 talampakan sa ilalim ng tubig.

Ikinasal sina V. Chinnadurai at S. Swetha kamaka-ilan sa ilalim ng dagat malapit sa Neelankarai, India.

Bago idaos ang kanilang kasal, kinailangan pang siguraduhin ng kanilang support team na sapat ang pagiging kalmado ng dagat para rito.

Ayon sa bagong kasal, tradisyunal pa rin naman ang ginawa nilang pag-iisang dibdib at ang tanging naiba lang ay ang pagdaraos nito sa ilalim ng dagat.

Ginawa nila sa ilalim ng tubig ang lahat ng sere­monya ng isang tradisyunal na Indian wedding kabilang na ang pagpapalitan ng mga kuwintas ng bulaklak.

Matagal nang lisensiyadong diver ang groom na si Chinnadurai, samantalang ang bride naman niyang si Swetha ay isang buwan pa lang natututong mag-scuba.

Ayon kay Swetha, nagpasya na rin siyang ituloy na ang kasal kahit siya’y kabado pa ring mag-dive, lalo na’t isang linggo na nilang hinihintay na ku-malma ang dagat at maging ligtas ito para sa kanilang kasal.