Pagluluwag sa ‘age restrictions’dapat na nga ba?
Niluwagan na nga ang age restrictions sa mga puwede nang lumabas ng bahay sa mga nasa modified general community quaratine (MQCG).
Kung dati mula 15 pataas, ibinaba na nga ito sa 10-anyos pataas na pinapayagan nang makalabas ng bahay.
Kaalinsabay naman nito, ang pagkumpirma ng Dept. of Health (DOH) na may karagdagan pang 16 na kaso ng UK COVID variant ang naitala sa bansa. Tatlo rito ang sinasabing minors.
Sumatotal, nasa 17 na ang kaso ng UK variant.
Pero ayon naman sa mga ekperto ‘premature’ pang sabihin na may local transmission na ang UK variant.
Sa mga unang pag-aaral patungkol sa UK COVID variant, hindi nga ba’t sinasabing mas mabilis itong makahawa, partikular umano sa mga bata.
Ang tanong ngayon dito, ngayong parami na ang bilang ng nagkakaroon nito, marapat nga ba na payagan na ang nasa 10-anyos pataas na palabasin ng kanilang mga bahay.
Plano na rin ng DOH na irekomenda sa IATF na irekonsidera ang kanilang desisyon dahil nga sa natuklasang mga kaso ng UK COVID variant.
Mukhang hindi nakuhanan ng opinyon ng IATF patungkol dito ang DOH na siyang mas nakakalaalm sa status o kalagayan ng paggamot sa virus sa bansa.
Dapat marahil na makunan ng opinyon ang lahat ng panig bago aprubahan ang isang rekomendasyon ng ibang ahensya.
Maging ang local goverment units, ay hindi nakonsulta ukol dito.
Kung pumayag man sila, ok walang problema , pero kung hindi sila kumbinsido, ordinansa uli ang pwedeng panapat dito.
Bagamat maganda ang layunin dito ng IATF, na mabalanse ang pangangalaga sa kalusugan at ng ekonomiya, pero kailangan pa marahil ang masusi pang pag-aaral at mga konsultasyon sa lahat ng sektor at sangkot na ahensya.
Makabubuting marinig ang ibat-ibang panig dahil nakasalalay dito eh kalugusan o buhay ng mga indibiduwal.
Aantabayanan natin ang magiging tugon ng IATF sa hiling ng DOH.
- Latest