Si Rex Gatchalian ang tunay na ‘yorme’!

TINULUYAN ni Valenzuela City Mayor Rex Gatchalian ang NLEX Corp. Sinuspende ang business permit nito noong Lunes dakong alas singko.

Sa aking panayam kay Mayor Rex sa BITAG Live, sinabi niyang lumabag ang NLEX sa iba’t ibang alituntunin sa Valenzuela. Kasama rito ang public safety, general welfare at consumer rights.

“Ngayon sana matauhan na sila. Maliit man ang local govern­ment unit at malaki man silang negosyo, they can’t get away with highway robbery every single day,” ani Mayor Rex.

Maramin na kaming pinagsamahan ni Mayor Rex kung public service ang pag-uusapan. Hindi na mabilang ang mga negosyong naipasara niya dahil sa mga paglabag nito hindi lamang sa karapatan ng mga empleyado.

Kaya hindi ko na ikinagulat ang mala-David at Goliath na senaryo noong Lunes sa Mindanao Avenue Toll Plaza habang sini-serve ang suspension.

Sasabihin ng ilan, “LGU ka lang Mayor, maghinay-hinay ka.” Sagot ng mayor, “Ang business permit ay isang prebilehiyo, ito ay usaping lokal.”

Ang prebelihiyong ipinagkakaloob sa mga negosyong nasa Valenzuela ay may kaakibat na responsibilidad at obligasyon na sumunod sa regulasyon ng siyudad.

Kumbaga, kung si David ay may tirador, si Mayor Rex naman ay ginamit ang kapangyarihang bawiin ang business permit ng NLEX na lumabag sa tuntunin ng Valenzuela.

Sa ngayon, naka-holiday toll sa parte lamang ng Valenzuela toll gates. Kung hanggang kailan, “nasa kanila na ang bola kung kailan sila kikilos,” sagot ni Mayor Rex.

Unfiltered, kinuha ko rin ang kanyang panig hinggil sa mga nagsasabing pa-epal lamang ang mayor. Na dahil malapit na ang eleksiyon ay nagpapakitang gilas lamang ito. 

Simple lang ang kanyang sagot: “Kapag wala kang ginawa, tamad ang Mayor. Kapag may ginawa ka, pa-epal ka. Ang bashers lang ang nagbibigay-kulay sa ginagawa ng iba.” 

Dagdag pa ni Mayor Rex, “Ben, simula’t sapul ay hands on na ako. Ginagawa ko lang ang trabaho ko. Walang pulitika, walang halong pangangampanya.”

Ito ang tunay na yorme. Walang papogi, walang maraming satsat, aksiyon agad!

“Sa palagay ko ngayon, gising na gising na ang NLEX,” sabi ni Mayor Rex sa aking interview.