Sindikato ng droga online, tutukan!
Dahil nga sa pandemya, naging patok ang mga online transaction.
Dito bumaling ang marami nating mga kababayan, mula sa pagbebenta ng kung anu-ano, meron din naman na dito na nagsa-shopping sa takot na lumabas at mahawa sa COVID.
Talagang umalagwa ang online business at mga deliveries, eto ito na rin ang ginamit ng maraming sindikato maging ng drug syndicate na hindi nagpahuli at dito na rin isinagawa ang pamamaraan ng kanilang operasyon.
Bukod naman dyan, umariba rin ang iba’t ibang scams na bumiktima sa marami nating kababayan.
Nakatawag pansin na rin ito sa mga mambabatas kaya nga sa Mababang Kapulungan ng Kongreso sisimulan na nilang imbestigahan ang mga online scams.
Kasama na nga rito ang bentahan ng ilegal droga, iba pang scams at mga pekeng transaksyon.
Kinumpirma ng PDEA, na may mga nasabat ng ilegal droga na pinapadaan sa online transaction.
Maging drug paraphernalia, nabibili rin online sa iba’t ibang shopping sites.
Ibinunyag din ng PDEA na sinasamantala ng mga sindikato ng droga ang paglakas ng demand sa mga online selling platform na dito na rin sila nag-o-operate.
Maging ang TNVS at mga delivery riders ay kinasangkapan din ng sindikato ng ilegal na droga sa pagdedeliber ng kanilang mga package.
Kaya nga dapat ding maging mahigpit ang ilang online platforms, wag lang arya nang arya para lang kumita.
Dito rin nangangailangan ng mas mahigpit pang pagmomonitor ang mga kinauukulan lalo na nga’t dyan na nagpapatuloy ng operasyon ang maraming uri ng sindikato at scams.
- Latest