Modus online, humahataw, publiko pinag-iingat!
Sa panahon ng community quarantine kung saan matagal na natigil sa kanilang mga bahay ang ating mga kababayan, dito na rin umarangkada ang mga online transactions at online shopping at iba pang kahalintulad nito.
May ilan din naman na dito na rin nagsimula ng kanilang maliit na negosyo o pagkakakitaan lalo na ang nawalan nang hanapbuhay dahil sa pandemya.
Naging positibo ito sa ilan, pero ito rin naman ang sinamantala ng maraming mga kawatan na dito nagsagawa ng kanilang mga modus.
Sa kabila nga ng nagaganap na pandemya, kinumpirma ng Philippine National Police Anti-Cybercrime Group (PNP-ACG) na lumobo ang mga kaso ng online scams at computer-related identity thefts sa bansa, sa panahon ng community quarantine.
Sa kanilang inilabas na datos, nabatid na nasa 869 online scams ang naitala nila mula Marso hanggang Setyembre 2020.
Lumilitaw na nasa 37.2% ang itinaas nito kumpara sa 633 kaso na naitala sa kahalintulad na petsa noong nakaraang taon.
Hindi lang ‘yan maging ang tinatawag na identify thefts kung saan ang mga tao ay nagpapanggap na ibang tao upang makagawa ng krimen, ay tumaas din ng 21.47% o mula 298 ay naging 362.
Ayon nga kay ACG spokesman Maj. Joseph Villaran, sinamantala ng mga kriminal ang COVID pandemic para manloko ng mga mamamayan na naipit sa kanilang mga tahanan dahil sa ipinatutupad na mga community quarantine.
Nakisabay ang mga kawatan sa ating mga kabayan na lumipat sa paggamit ng online transactions dahil sa pandemya.
Kung tumaas ang kaso ng online scams, iniulat din ng ACG ma bumaba naman ang cybercrimes sa pangkalahatan, ng 4.26% o mula 3,001 ay naging 2,873.
Ibang klase talaga ang mga kriminal at kawatan, sumasabay talaga sa mga makabagong teknolohiya, hindi nagpapahuli kaya naman ibayong pag-iingat ang kailangan ng publiko para di mabiktima ng ganitong mga uri ng modus online.
- Latest
