Flying car sa Japan, sumailalim na sa test flight
ISANG kompanya sa Japan ang isinapubliko ang kanilang prototype flying car na nagawa nilang mapalipad para sa test flight nito.
Inanunsiyo ng SkyDrive Inc. ang matagumpay na test flight ng kanilang SD-03 flying car model sa Toyota Test Field sa Toyota, Japan. Nagawang lumipad ng “flying car” sa loob ng apat na minuto.
Ang SD-03 ay isang single-seat flying car at sinasabing ito ang pinakamaliit na sasakyan sa mundo na kayang mag-vertical take off o lumipad pataas nang walang buwelo.
Aakalaing motorsiklo na kinabitan ng apat na propeller ang SD-03. Sa pamamagitan ng mga propeller na ito ay kayang lumipad ng SD-03 ng 10 minuto, na nais pang patagalin ng kompanya ng 30 minuto.
Plano ng SkyDrive na maibenta sa publiko ang kanilang flying car pagdating ng 2023.
- Latest