Aso, humingi ng saklolo para sa 88-anyos na amo
BAYANI ang turing ngayon sa isang aso sa California matapos magawa nitong makahingi ng saklolo para sa 88-anyos niyang amo na natumba sa loob ng kanyang bakuran.
Kita sa kuha ng home security camera ang paglapit ng asong si Sandy sa trash collector na si Kirk White para humingi ng tulong para sa among si Johnson Glendale.
Ayon kay White, agad niyang napansin na sinusubukan ng aso na kuhanin ang atensiyon niya.
Sa paraan daw ng pagtahol ng aso ay malinaw raw na may gusto itong ipakita sa kanya sa loob ng bakuran ni Glendale.
Dahil dito, sinundan ni White si Sandy papasok ng bakuran at doon na nga niya nakita ang nakabulagtang amo nito na si Glendale.
Natumba pala si Johnson at dahil sa katandaan ay hindi niya magawang makatayo muli. Napansin niyang dumaan sa harap ng bahay niya ang mga basurero ngunit hindi naman niya makuha ang atensiyon ng mga ito.
Mabuti na lamang at nasa tabi niya si Sandy, at ito ang gumawa ng paraan para mapansin ng isang basurero — si White nga.
Tinulungan ni White si Johnson na makatayo at sinigurado niyang maayos ang kalagayan ng matanda bago siya umalis.
Dahil sa ipinakitang kabayanihan, marami ang pumuri kay Sandy, kabilang na si White na gusto na ring magkaroon ng alagang aso.
- Latest