EDITORYAL - Hindi magandang plano ng DOTr
MAY plano ang Department of Transportation (DOTr) na maningil ng toll fee sa kahabaan ng EDSA. Bagama’t binawi na ng DOTr ang unang pinahayag noong Biyernes, nag-iwan naman ito ng pagkabalisa sa mga motorista. Sinabi ni DOTR Assistant Secretary Alberto Suansing na ang proposal na paglalagay ng toll way sa EDSA ay makakatulong para mabawasan ang trapik bukod pa sa makadaragdag nang malaki sa revenue ng pamahalaan ang makokolektang toll fee. Kapag naaprubahan, sisimulan ito sa susunod na taon, sabi ni Suansing.
Ayon kay Suansing, ang paniningil ng toll fee ay mula 7:00 ng umaga hanggang 10:00 ng umaga at mula 4:00 ng hapon hanggang 9:00 ng gabi. Maaaring magsimula ang toll sa Quezon Avenue hanggang Roxas Blvd. Uniform umano ang charges sa mga motorista at gagamitin dito ang Radio Frequency Identification (RFID) technology tuluy-tuloy ang paglalakbay ng mga motorista.
Maraming tumutol sa balak ng DOTr. Sa halip daw na lagyan ng toll isaayos na lang ang ginagawang proyekto sa EDSA kung saan, nasa kaliwa ang mga bus at may sariling sakayan at babaan ang mga pasahero. Mas maganda raw ito sapagkat hindi maaagawan ng lane ang mga pribadong sasakyan sa kanang lane. Lagyan daw nang maayos na shades ang mga pasaherong bababa at sasakay ay okey na ang EDSA.
Isa pa, kung maniningil ng toll, dapat pagandahin ang EDSA. Hindi dapat baku-bako ang kalsada. Sa kasalukuyan, pawang tapal-tapal lamang ang kahabaan ng EDSA. Maari bang maningil ng toll kung masama ang daraanan ng mga sasakyan. Parang hindi tama na maniningil ng toll pero baku-bako ang EDSA.
Hindi maganda ang planong ito at mabuti naman at binawi agad. Kailangang mag-isip pa nang malalim ang taga-DOTr para naman hindi mapintasan. Sa kasalukuyang ang mamamayan ay tuliro na sa pandemya, hindi dapat ligaligin sa mga planong pandagdag sa pasanin at gastos dahil marami ang walang hanapbuhay.
- Latest
