Tae at ihi ng baka, pinagkukunan ng kuryente; 1,000 kabahayan nailawan
HINDI lamang masarap na gatas ang napapakinabang sa mga baka, pati kuryente ay nakapagbibigay sila.
Sa isang dairy farm sa Indiana, USA ang mga tae at ihi ng baka ay source ng kuryente.
Namuhunan si Floyd Houin, may-ari ng dairy farm sa isang teknolohiya na ang mga tae ng baka ay pinagkukunan ng kuryente.
Hindi nagkamali si Floyd sa pinasok na negosyo sapagkat ngayon malaki ang ibinabayad sa kanya ng isang local electric company dahil sa pagsusuplay niya ng kuryente na nakukuha mula sa dumi ng mga baka. Nasa 1,000 kabahayan ang nailawan dahil sa biogas.
Ayon kay Floyd, bukod sa pinagkakakitaan, nakakatulong din daw ang biogas technology na kanilang ginagamit upang mapanitili ang kaayusan ng kanilang kapaligiran.
Ang isa pang dahilan kung bakit sila namuhunan sa biogas technology ay upang maalis ang baho na nanggagaling mula sa dumi ng kanilang mga alagang baka na nakakasulasok sa kanilang mga kapitbahay.
Nasa 265,000 na litro ng dumi at ihi mula sa kanilang 3,400 na alagang baka ang naiipon sa dairy farm araw-araw. Hinihigop ng makina na kung tawagin ay anaerobic digester ang amoy na nanggagaling sa mga ito pati na rin ang greenhouse gases na dahilan ng global warming.
Ang amoy at greenhouse gases na ito ang ginagawang biogas na pinanggagalingan ng kuryente. Hindi rin napapatapon ang natirang dumi dahil ginagawa itong fertilizer.
Namuhunan ng $6 milyon si Floyd sa biogas technology at nasulit na ang kanilang ginastos dahil sa laki ng kanilang kinikita mula sa kuryenteng naipagbebenta mula sa dumi ng kanilang mga baka.
- Latest
