Ang babae sa aparador (101)
HINDI akalain ni Ziarah na nasa labas na pala ng restaurant si Jonas at doon inaabangan ang paglabas ni Kat at kasama nitong lalaki na mukhang Japanese o Chinese.
Kaya nagtataka si Ziarah kung bakit hindi ito lumulutang o nagpapakita ay dahil nasa labas na. Siguro’y iniiwasang magkaroon ng konprontasyon sa harap nang maraming tao. Ipinakita ni Jonas ang pagiging edukado sa hindi pagkompronta kay Kat at sa kasama nito.
Pero ngayon, nakita ni Ziarah mula sa kinauupuan na magkakaroon a ng komprontasyon.
Wala nang makakapigil pa kay Jonas na marahil ay napuno na kay Kat dahil sa pagsisinungaling nito at higit sa lahat, may kasama pang ibang lalaki.
Naisip ni Ziarah, siya man ang nasa kalagayan ni Jonas ay magwawala rin siya. Lalo pa at binuhusan ng pagmamahal ang babae.
At sa isang iglap, nakita ni Ziarah ang pagsugod kay Kat. Mismong sa parking area ng restaurant ang eksena. Walang ibang tao sa parking area.
Kitang-kita niya nang harapin at pagsalitaan ni Jonas si Kat. Bagama’t hindi niya naririnig ang boses, kitang-kita ni Ziarah ang nagbabagang ekspresyon ng mukha ni Jonas.
Mukhang masama ang mangyayari. Nagpasya si Ziarah na tawagin ang waiter para ipaalam ang nangyayari sa labas at nagpa-billout na rin siya.
‘‘Pakisabi sa guard, may nag-aaway sa labas. Baka may magkasakitan. Pakibigay na rin ang bill ng kinain ko,’’ sabi niya sa waiter.
“Opo Mam, sasabihin ko sa guard,” sabi ng waiter at mabilis itong umalis.
Pagtingin muli ni Ziarah sa labas, nakita niyang nakikipagsuntukan na si Jonas sa lalaking kasama ni Kat.
Si Kat naman ay nakita niyang tila kampi pa sa kasamang lalaki. Parang sumisigaw pa ito pabor sa kasamang lalaki.
Nakita niyang tinamaan sa pisngi si Jonas. Mukhang sanay makipaglaban ang kasama ni Kat. Parang UFC fighter.
Nakita niya na sinipa pa nito sa sikmura si Jonas habang nakatingin at natutuwa pa si Kat.
Napasigaw si Ziarah.
Hindi na niya napigil ang sarili. Awang-awa siya kay Jonas.
“Kuya Jonasss! Kuya Jonasss!’’
Napalingon ang mga taong kumakain kay Ziarah sa lakas ng sigaw niya. (Itutuloy)
- Latest