Sa kagustuhang ‘paiyakin’ ang dating nobyo, babae sa china nagpadala ng 1,000 kilong sibuyas
ISANG babae sa China ang nagpadala ng 1,000 kilong sibuyas sa bahay ng kanyang dating nobyo bilang ganti sa pag-iwan nito sa kanya.
Sandamakmak na sibuyas ang kanyang ipinadala sa pag-asang magdudulot ito ng luha sa dating kasintahan, na sanhi raw ng tatlong araw niyang pag-iyak noong siya’y iniwan nito.
Naisip niyang padalhan ng sibuyas ang lalaki nang malaman niyang ni hindi man lamang ito nalungkot sa kanilang paghihiwalay.
May kasama pang mensahe ang mga sibuyas na nagsasabing pagkakataon na ngayon ng lalaking umiyak matapos ang tatlong araw na luhang idinulot niya sa kanyang dating nobya.
Nang tanungin naman ang lalaki sa isang panayam kung bakit siya nakipaghiwalay sa babae ay isang dahilan lamang ang sinabi niya: masyadong ma-drama raw ang pag-uugali nito.
- Latest
