Sundalo sa Russia, nag-propose gamit ang 16 na tanke

PARA mag-propose sa kanyang nobya, isang tinyente sa Russian army ang gumamit ng 16 na tanke na nagsipuwesto upang bumuo ng hugis puso.   

Nagkaroon ng pansamantalang pagtigil ang military exercises na isinasagawa malapit sa Moscow matapos ipag-utos ng platoon commander na si Denis Kazantsev na bumuo ng heart shape ang mga T-72B2 tanks na kalahok. 

Makikita sa video ng proposal ang pagpuwesto ng tanke sa isang hugis puso na formation, bago akayin ni Kazantsev ang kanyang nobya sa gitna nito.

Nakapiring ang mga mata ng babae kaya naman nagulat ito sa mga tankeng nakapaligid sa kanila ni Kazantsev, na nag-propose na sa kanyang nobya sa pamamagitan ng pagluhod at pag-abot ng engagement ring.

Tagumpay naman ang “operasyon” dahil ibinigay ng babae ang kanyang matamis na “Oo” kay Lt. Kazantsev.