12-talampakang semento para sa nabaling paa, ginawa ng ospital sa Chicago

ISANG ospital sa Chicago ang nakapagtala ng bagong Guinness world record sa pamamagitan ng paglikha ng isang orthopedic cast na 12 talampakan ang haba at 5 talampakan ang lapad.

Ayon sa Northshore Orthopaedic & Spine Institute, kakasya ang semento sa paa ng isang tao na 78 talampakan ang tangkad.

Ayon sa ospital, ginawa raw nila ito upang mamulat ang publiko sa pag-aalaga sa ating mga buto.

Ipineresenta naman ng Guinness World Records sa ospital ang certificate na nagpapatunay na ang semento sa paa nga ng ospital ang pinakamalaki sa buong mundo.

Katulad ng nakagawian kapag may mga kaibigan tayong nakasemento ang bali ay iniimbitahan ng ospital ang publiko na pumir­ma sa dambuhalang orthopedic cast na kanilang ginawa.