Lalaki sa Canada, nailihim ng 10 buwan ang pagkapanalo ng $60-m sa lotto

ISANG Vietnamese refugee na nag-alaga ng iisang kombinasyon ng lottery numbers simula ng siya’y nag-migrate sa Canada 36 taon na ang nakararaan ang nanalo ng $60 million (katumbas ng P2.3 bilyon) jackpot, ngunit inilihim niya ito sa lahat sa loob ng 10 buwan.

Nito lamang nakaraang Miyerkules kinubra ng 55-anyos na si Bon Truong ang premyo sa Edmonton, Alberta.

Ayon kay Truong, pinag-isipan niya muna ang mga maaring epekto ng bigla niyang pagyaman sa buhay niya at kanyang pamilya kaya minabuti niyang pansamantalang itago muna ang lotto ticket sa isang kaha de yero.

Ngayong nakapag isip-isip na siya ay babayaran daw niya ang utang nila sa bahay at magbabakasyon daw sila ng kanyang pamilya. Sa kabila rin daw ng pagiging mil­yonaryo, ipagpapatuloy pa rin niya ang pagtatrabaho niya bilang hardinero.

Binili raw ni Truong ang lotto ticket sa isang casino at ang mga tumamang numero ay kombinasyon ng mga petsang mahahalaga sa buhay niya.