EDITORYAL - Linisin ng DSWD ang listahan ng mga ‘umaabusong’ seniors
HAMON ngayon sa Department of Social Welfare and Development (DSWD) ang napabalitang mga reklamo na marami sa senior citizens ang tumatanggap ng P500 monthly subsidy sa kabila na hindi naman kuwalipikado ang mga ito. Ayon sa mga reklamo, karamihan sa nakakatanggap ng P500 ay pensiyunado o pensiyonada na. “Nakaluluwag” sila at maayos ang buhay. Sa halip na maibigay ang P500 sa mga “kawawa” at “walang-wala”, sa bulsa ng mga nakaririwasang seniors ito napupunta.
Nakasaad sa Republic Act 9994 (Expanded Senior Citizens Act of 2010) na ang makatatanggap lamang ng P500 monthly subsidy ay ang mga senior citizen na 60-anyos pataas, may kapansanan, maysakit, mahina ang pangangatawan; hindi pensiyonado ng Government Service Insurance System (GSIS) at Social Security System (SSS), Philippine Veterans Affairs Office, Armed Forces and Police Mutual Benefit Association Inc. at iba pang insurance company; walang regular na suporta sa pamilya nito at kamag-anak para sa araw-araw na pangangailangan.
Malinaw ang nakasaad sa batas kaya nakapagtataka kung paano nakalulusot sa DSWD ang mga seniors na nakatatanggap ng buwanang P500. Ibig sabihin, hindi nakikipag-ugnayan ang DSWD sa SSS o GSIS kaya hindi nila nalalaman na napapalusutan na sila ng mga seniors na nakaririwasa naman pala. Napakaluwag marahil ng DSWD kaya madali silang napaglalalangan ng mga senior.
Nagpahayag din ng pagkabahala ang Commission on Audit (COA) sapagkat dumami umano ang mga beneficiaries para sa P500 monthy subsidy. Nagdududa na rin ang COA na maaaring hindi nasusubaybayan ng DSWD ang galaw sa pagbibigay ng subsidy para sa mga kuwalipikadong senior citizens. Palagay ng COA, marami sa beneficiaries ang hindi talaga dapat mabigyan ng P500 sapagkat hindi ku-walipikado ang mga ito.
Hamon sa DSWD na magkaroon nang tama at maayos na pagsisiyasat sa mga binibigyan ng buwanang P500. Magkaroon ng pagtatanong ang DSWD sa mga nakalistang seniors para matiyak kung ang mga ito ay nagkukunwaring maralita lamang. Silipin at baka sila ay “nag-aarimuhan” lamang sa P500.
- Latest
