Runner sa Texas, nag-dive ala-superman para manalo sa karera

PANALO ang Texas A&M University track star na si Infinite Tucker sa 400-meter hurdles event ng 2019 SEC Track & Field Championships matapos siyang mag-dive na parang si Superman papunta sa finish line.

Gitgitan ang laban ni Tucker at kanyang teammate na si Robert Grant sa huling leg ng karera na idinaos sa Arkansas.

Matapos niyang malampasan ang huling hurdle, buong bilis na tumakbo si Tucker at nag-ala-Superman sa pamamagitan ng pag-dive papunta sa finish line, dahilan upang maungusan niya ng kaunti si Grant.

Ayon kay Tucker, hindi naman daw niya ginaya si Superman sa ginawa niyang pag-dive. Tumalon lamang daw siya papunta sa finish line dahil nakita niya na nandoon ang kanyang ina na naghihintay, ayon sa panayam niya sa ESPN.

Ayon sa head coach ng Texas A&M na si Pat Henry, sinabihan na raw niya si Tucker na hindi naman garantisadong mas mabilis niyang mararating ang finish line kung mag-dive siya kaya mas mabuting takbuhin na lang niya ito.

Nagbiro pa siya na baka raw inakala ni Tucker na mi-yembro siya ng swimming team noong araw na iyon kaya siya biglang napa-dive.

Si Tucker ang isa sa mga pangunahing runner hindi lamang sa US kundi pati na rin sa buong mundo kung saan pangsampu siya sa world list.