EDITORYAL - Daming batang Pinoy ang hindi nababakunahan

NAKABABAHALA ang report ng United Nations Children Fund (UNICEF) na 2.9 milyong batang Pinoy ang hindi nababakunahan.

Dahil dito, posible silang magkasakit nang malubha gaya ng tigdas na nanalasa sa bansa noong nakaraang taon at nagpapatuloy pa sa kasalukuyan. Bukod sa tigdas, marami rin ang nagkaka-dengue sa kasalukuyan. Tumaas ang bilang ng mga nagka-dengue kahit pa tag-araw. Kinatatakutan din ang pagkakaroon ng polio at rubella dahil sa kawalan ng bakuna ng mga bata.

Ayon sa UNICEF, bumaba ang bilang ng mga batang nabakunahan sa tigdas mula 88 percent noong 2013 ay naging 73 percent na lamang noong 2017. Noong nakaraang taon, muli pang bumaba ang mga nagpabakuna laban sa tigdas at umabot na lamang sa 70 percent.

Mula Enero ng kasalukuyang taon, naitala ang 30,000 kaso ng tigdas sa buong bansa at 389 bata ang namatay sa sakit. Ayon sa health experts, kung nabakunahan lamang ang mga bata laban sa tigdas, maaaring napigilan ang pagkamatay ng mga ito.

Ayon sa UNICEF, maraming dahilan kung bakit hindi nababakunahan ang mga bata: 1) natatakot ang publiko; 2) kawalan ng stock ng mga pambakuna; 3) kawalan ng mga trained health workers; at 4) malayo ang lugar ng mga bata at hindi na mapuntahan ng mga health workers.

Sa aming palagay, nakadagdag sa problema ang pagkatakot sa dengue vaccine kung saan naiulat na maraming bata na nabakunahan ng Dengvaxia noong 2016 ang namatay. Nagkaroon ng dengue immunization kung saan maraming school children ang binakunahan ng Dengvaxia. Subalit lumabas ang mga balitang may mga namatay makaraang mabakunahan. Inamin ng Sanofi Pasteur, maker ng Dengvaxia noong Nobyembre 2016 na dapat ang mabakunahan lamang ay ang mga nagka-dengue na. Magkakaroon ng serious problem kapag naisaksak ang Dengvaxia sa hindi pa nagkaka-dengue. Dahil sa alingasngas ng Dengvaxia, maramimg magulang ang natakot pabakunahan ang kanilang mga anak.

Nararapat kumilos ang Department of Health (DOH) para mahikayat ang mga magulang na pabakunahan ang kanilang mga anak lalo sa tigdas. Bakuna lamang ang tanging paraan para hindi magkasakit.