Mga sinehan maglalaho na rin ba?

MARAMING linggo na ang nakararaan, napabalita at ku­malat maging sa social media ang himutok ng isang movie director na kumokonti na umano ang mga nanonood ng mga pelikula sa mga sinehan na ikinalulugi ng maraming movie companies. Maraming naglabasang mga reaksyon na nagmumungkahi ng mga kadahilanan dito tulad ng mababa at mahinang kalidad ng pelikula, kababawan, walang kawawaang kuwento,  at ang nagmamahal na tiket sa sinehan. Merong sumasang-ayon at meron ding kumokontra. Maaaring may katotohanan din  naman ang kanyang  mga litanya. Maaaring may naglalabasan pa ring mga lokal na pelikula pero dumadalang at higit pa ring nakakarami ang mga dayuhang pelikula. Bukod dito, may mga pelikulang lokal na sa telebisyon o ibang social media platform na lang ipinalalabas sa halip na sa mga sinehan.

Isa sa masasabing totoong dahilan ang sobra nang napakataas ng presyo ng mga tiket sa sinehan na lumalampas na sa P200 na pinangangambahang hindi na malayo at hindi na magtatagal na aabot na ito sa P300 at mahigit pa. Sino na lang ang mga taong makakapasok sa mga sinehan kung ganito ang presyo niya?  Mukhang naglaho na ang dating imahen ng mga sinehan bilang pinakamura at pinaka-popular na uri ng libangan ng masang Pilipino.  Maaaring iba ang sitwasyon ng mga sinehan sa ibang mga bansa pero, dito sa Pilipinas, ang mga sinehan natin ngayon ay hindi na tulad ng dati noong dekada ‘50, ’60, ’70 at ’80 na isa sa pangunahing libangan ng mga tao nang naturang mga panahon ang pagdagsa, pagpila at panonood ng mga pelikula sa mga sinehan. 

Wala pa naman akong nababasang pag-aaral o pananaliksik hinggil sa kasalukuyang sitwasyon sa mga sinehan pero tiyak namang maoobserbahan ito ng sino mang mahilig manood ng mga pelikula rito. Isa pa, tila karamihan ngayon ng mga sinehan ay nakabase na sa mga shopping malls. Bihira na iyong mga nagsosolo o indipindiyenteng sinehan. At sa mga shopping malls, iniieskedyul na rin ang oras ng panonood ng pelikula rito. Hindi tulad noong araw na maaaring makapasok sa sinehan kahit kasisimula pa lang o nasa kalagitnaan na  o patapos na ang pagpapalabas ng pelikula at maaaring ulitin ang panonood.  Tila iniipon na lang muna ang mga manonood sa isang takdang oras para marahil matiyak na may papasok sa sinehan.

Pero isa ring masasabing salik sa pagkonti ng mga pumapasok sa mga sinehan ang pagdami sa kasalukuyan ng mga anyo ng paglilibang. Sa pagbabago ng panahon, hindi lang sa mga sinehan makakapanood ng pelikula. Kung noong araw ay makakapanood ka ng pelikula sa pamamagitan ng Betamax o DVD player (pirated man o original ang bala) kahit nasa bahay ka lang, ngayon ay nakakapanood na rin ng pelikula sa internet tulad sa YouTube at iba pang website. At makakapanood ka ng pelikula kahit sa smartphone at tablet o iPad.  Makakapanood ka ng pelikula kahit nakahiga ka, nasa bahay, bumibiyahe ka, nasa bundok o liblib na lugar  o kahit nasaang lugar ka man. Dumami at naglipana ang mga kakumpetensiya ng mga sinehan. Sumulpot pa ang ilang mga kumpanyang nakabase sa internet na nag-aalok ng koleksiyon ng mga pelikula. Isa rito ang Netflix na kinahuhumalingan na nang maraming tao sa mundo.

Pero siguro ang mga sinehan na naging bahagi ng makalumang panahon ay hindi maiiwasang maglaho kasabay ng ibang bagay na nalaos at nawala sa patuloy na pag-unlad ng teknolohiya maliban na lang kung makakagawa ng epektibong paraan ang mga kinauukulan para patuloy itong tangkilikin ng mga tao. 

(Anumang reaksyon sa kolum na ito ay i-email sa [email protected])