‘Online scammers, bistado na ang inyong Estilo!’ (1)

FACEBOOK, Twitter, Instagram, YouTube --- name it! Anumang uri ng social media at pakulo sa internet, patok sa mga millennials.

Ang pinakasikat, hindi lang sa mga kabataan ay ang online shopping. Sino ba nga naman ang hindi maeengganyo sa serbisyong ito, nakakapamili ka ng iyong mga kailangan ng nakaupo at papindut-pindot lamang.

Kaya naman ang mga kawatan, nakita ito bilang isang oportunidad na makapanggoyo ng mga parokyano.

Sa talaan ng mga eksperto, mahigit limampung milyong Pilipino ang aktibong gumagamit ng internet at sa pinakahuling datos ng Philippine National Police- Anti-Cybercrime Group (PNP-ACG) pumapangalawa ang online scam sa mga reklamong kanilang natatanggap.

Halos 500 kaso ng online scamming ang naitala ng PNP-ACG noong taong 2016. Lumobo ito kumpara noong 2015 na nasa 300 lamang.

Hindi pa dito kasama ang mga reklamong aming natatanggap at ‘yung mga biktimang pinili na manahimik na lamang para iwas abala at sakit ng ulo.

Nakababahala, dahil patuloy ang pagdami ng mga biktima. Iba’t-ibang halaga, iba’t-ibang mukha ng mga putok sa buhong seller kuno subalit iisa ng estilo, kubrahin ang pera ng mga pobreng online shoppers.

Maka-ilang ulit na naming nai-dokumento at nai-palabas ang mga ganitong klase ng reklamo. Mga pobreng nadadala sa matatamis at mabubulaklak na pananalita ng mga taong ‘di naman nila nakikita.

Gamit ang mga magagandang larawan ng iba’t-ibang items, samahan mo pa ng konting palabok lang na mga salita ng seller, si Juan buyer agad ng nagpakawala ng pera.

May mangilan-ngilan na kaming nahuli at naipakulong subalit madami pa din ang namamayagpag at patuloy na nabibiktima dahil may ilang hindi rin nadadala, sige pa rin ang buyla.  

Babala sa mga suki ng online shopping, matalinong matsing ang mga manggagantso sa likod ng modus na ito. Lingid sa inyong kaalaman, ang inyong katransaksiyon ay gumagamit ng mga pekeng pagkakakilanlan at identification cards.

May mga kasapakat itong mga remittance centers, kinakaibigan ang mga empleyado para maging maluwag ang pag-release ng mga hinulog niyong pera.

At dahil nagtatago sa iba’t ibang pangalan ang mga dorobong ito, nahihirapan maging ang mga otoridad na lambatin ang mga mokong.

Paano makaiwas na mabiktima ng modus na ito? Abangan ang ikalawang bahagi ng kolum na ito. Ibubunyag ko pa ang ibang estilo ng mga salot na ito maging ang ilang babala upang hindi magantso…