Barangay officials na walang BADAC, kakasuhan ng DILG
MANILA, Philippines — Nagbabala ang Department of Interior and Local Government (DILG) na sasampahan nila ng kaukulang kaso ang mga opisyal ng barangay na hanggang ngayon ay wala pa ring Barangay Anti-Drug Abuse Council (BADAC).
Ayon kay DILG spokesman Assistant Secretary Jonathan Malaya, hindi naman sila nagkukulang sa pagpapaalala sa mga bara-ngay leaders na magtayo ng BADAC kaya walang dahilan upang makalimot silang mag-organisa nito.
Sa katunayan aniya ay paulit-ulit na nga sila sa pagsasabi sa mga barangay officials na magtayo ng BADAC, lalo na ang mga barangay na malala ang problema laban sa illegal na droga.
Noong nakaraang taon aniya ay nagpadala pa sila ng liham sa mga naturang barangay officials, at hiningi ang paliwanag ng mga ito kung bakit wala silang BADAC.
Sa kabila naman nito, nakarating aniya sa kanilang kaalaman na hindi pa rin tumatalima ang mga naturang barangay officials sa paglalagay ng anti-drug councils.
Nagbabala naman si Malaya na sakaling mabigo pa ang mga ito na mag-organisa ng BADAC sa kabila ng kanilang paulit-ulit na paalala ay pagsasampa na ng kaukulang kaso ang kanilang magiging kasunod na aksyon.
“Ang susunod naming hakbang ay magsasampa na kami ng mga kaukulang kaso sa kanila (barangay officials na walang BADAC) for negligence, for failure to implement. Mga kasong administratibo ang aming isasampa laban sa barangay na hindi nakapag-organisa ng BADAC,” aniya pa.
- Latest