Binata utas sa tandem, beybi hagip ng ligaw na bala, kritikal
MANILA, Philippines — Patay ang isang 23-an-yos na binata nang pagbabarilin ng riding in tandem habang nasa kritikal na kondisyon ang isang taong gulang na babae matapos naman itong tamaan ng ligaw na bala sa ulo kamakalawa sa Makati City.
Nakilala ang nasawi na si Jerome Hernandez, ng C. Francisco St., Brgy. asilawan ng naturang siyudad.
Ginagamot naman sa Santa Ana Hospital at nangangailangan ng dugo ang nasa kritikal na kondisyon na sanggol na si Sophia Camilon, 1-taong gulang, ng naturang lugar.
Blanko pa ang pulisya sa pagkakakilanlan sa mga suspect at nagsasagawa pa ng follow-up hinggil dito.
Sa report na isinumite ng hepe ng Makati City Police na si Police Sr. Supt. Gerry Umayao sa tanggapan ng Southern Police District (SPD), naganap ang insidente alas-5:19 ng hapon sa panulukan ng Cagayan at C. Francisco Sts., Brgy. Kasilawan ng naturang siyudad.
Nakatayo umano ang biktima sa naturang lugar nang biglang dumating ang isang motorsiklong walang plaka lulan ang dalawang suspects.
Isa sa mga suspect ang bumunot ng baril at pinagbabaril ang biktimang si Hernandez na naging sanhi ng agaran nitong kamatayan.
Samantalang ang paslit na si Sophia naman ay kasama ang ina sa labas ng bahay ay tinamaan ng ligaw ng bala sa ulo mula sa pagpapaputok ng mga suspect habang binabaril ng mga ito si Hernandez.
Matapos ang pamamaril ay mabilis na tumakas ang mga suspect matapos ang isina-wang krimen.
- Latest