Misis bumili ng kailangan ng mga anak, inutas ng mister
MANILA, Philippines — Kalunus-lunos na kamatayan ang sinapit ng isang misis sa kamay ng mister matapos pagsasaksakin dahil lamang sa pagbili ng pangangailangan ng kanilang mga anak sa Sitio Magapo, Brgy. Behia, Magallanes, Sorsogon kamakalawa ng gabi.
Malalalim na saksak sa iba’t ibang bahagi ng katawan ang agarang ikinasawi ng biktimang si Edna De Vera Burton, 45-anyos habang tinutugis na ang tumakas na asawa na kinilalang si Carlos, 44-anyos, mangingisda, kapwa residente ng naturang lugar.
Sa ulat, nag-away umano ang mag-asawa nang magalit ang mister makaraang malaman na namili ang misis ng mga pangangailangan ng kanilang mga anak.
Dito ay nagkaroon nang mainitang pagtatalo ang mag-asawa hanggang sa kumuha ng patalim ang mister at pinagsasaksak ang misis na agarang nasawi.
Narekober ng mga rumespondeng pulis ang patalim na ginamit sa pananaksak habang inihahanda na ang kasong parricide na isasampa laban sa suspek na tinutugis ng pulisya.
- Latest
