Barangay chairman, 4 pa patay sa ambush!

2 pang kasama sugatan..

MANILA, Philippines — Patay ang isang barangay chairman at apat pang kasama kabilang ang dalawa nitong kapatid nang tambangan at pagbabarilin ng hindi pa nakikilang armadong grupo, habang lulan ng pickup truck, kamakalawa ng hapon sa Zamboanga del Norte.

Sa ulat ng Zamboanga del Norte Police, dead-on-the-spot sa insidente sina Chairman Allie Manangca ng Brgy. Baluban; kapatid na sina Ani at Alfahad Manangca; kamag-anak na si Anisa Manangca at isang Shilben Mussadin Basa.

Nilalapatan naman ng lunas sa opistal ang mga sugatan na sina Alwaf Manangca at Norman Tulino, kapwa magsasaka.

Ayon kay Col. Glen Dulawan, Zamboanga del Norte Provincial Police Office director, sakay ng Toyota Hilux ang mga biktima at tinatahak ang kahabaan ng Brgy. Pina sa Sirawai nang paulanan ng bala ng mga kalalakihan na armado ng matataas na kalibre ng baril.

Ilan sa mga saksi ang nakakita na tinarget ng mga suspek ang ulo at katawan ng mga biktima. Tadtad din ng bala ang sasakyan ng mga biktima.

Matapos ang krimen, mabilis na nagsitakas ang mga suspek sa iba’t ibang direksiyon.

“Rido” o clan war ang isa sa mga nakikitang dahilan ng mga awtoridad na motibo sa ambush.

Lumilitaw na isang insidente ng pamamaril noong Disyembre 2022 sa bayan ng Sirawai ang nangyari at ang pamilya ng nasabing barangay captain ang pinagdudahang responsable rito.

Inilunsad na ang hot pursuit operations ng mga awtoridad sa mga karatig bayan ng Zamboanga del Norte laban sa tumakas na mga suspek.