2 pulis todas sa drug ops sa Pampanga!
CAMP OLIVAS, Pampanga, Philippines — Dalawang pulis ang patay matapos pagbabarilin ng limang armadong lalaki habang nagsasagwa ng drug operation sa Barangay Dau, Mabalacat City, Pampanga, kahapon ng madaling araw.
Kinilala ni Brig. Gen. Cezar Pasiwen, Police Regional Office-3 (PRO3) director, ang mga napaslang na pulis na sina PSMS Sofronio Capitle Jr at PSSG Dominador Gacusan Jr.; kapwa nakatalaga sa Mabalacat City Police.
Ayon kay Pasiwen, ang dalawang pulis ay nagsagsawa ng buy-bust operation sa nasabing lugar nang biglang dumating ang limang lalaki na armado ng mga baril at lulan ng dalawang magkahiwalay ng motorsiklo.
Sa report ng Police Regional Office (PRO) 3, dakong alas-3:40 ng madaling araw nitong Sabado nang magsagawa ng anti-drug operation sina Capitle at Gacusan hinggil sa umano’y tinitiktikan nilang tulak ng droga sa South Daang Bakal Road, Brgy. Dau ng lungsod.
Gayunman, habang paalis sa lugar pasakay ng motorsiklo ang dalawang parak ay pinaulanan sila ng bala ng limang pawang mga naka-bonnet na kalalakihan.
Pinaniniwalaan namang ang mga suspect ang tinatarget ng dalawang parak na grupo ng mga notoryus na tulak ng droga sa lugar.
Nagtamo ng mga tama ng bala sa iba’t ibang bahagi ng kanilang katawan ang mga biktima sanhi upang agad na masawi sa lugar, dagdag ni Pasiwen.
Matapos na makitang nakabulagta at wala nang buhay ang mga biktima, mabilis na nagsitakas ang mga suspek lulan ng kanilang mga motorsiklo patungong north direction.
Iniutos na ni Pasiwen kay Col. Levi Hope Basilio, Pampanga police provincial director na magsagawa ng malalimang imbestigasyon sa ginawang pagpatay sa dalawang pulis at agad na maresolba ito.
Nagsasagawa na ang Mabalacat Police ng manhunt operation laban sa mga suspek.
- Latest
