Empleyado ng korte sa Batangas, itinumba
BATANGAS, Philippines — Patay ang 42-anyos na court probation employee matapos barilin ng riding in-tandem sa Sto. Tomas City nitong Biyernes ng gabi.
Kinilala ni Police Major Allan Nidua, Sto. Tomas deputy police chief ang biktima na si Arnel Montablan, residente ng Barangay San Vicente, Sto Tomas City, Batangas at probation employee ng Tanauan City court.
Ayon sa report, nakaupo lang si Montablan sa gilid ng barangay road nang lapitan ng suspek at barilin ito bandang alas-7:35 ng gabi.
Batay sa salaysay ng mga saksi, may taas na 5’8”hanggang 5’11’’ ang gunman, naka white T-shirt at black na jacket.
Mabilis na nakatakas ang gunman sakay ng motorsiklo na minamaneho ng kasabwat nito at sumibad patungong Barangay San Vicente sa naturang lungsod.
Inaalam pa ng mga otoridad ang motibo at ang responsable sa krimen.
- Latest
