Vice Mayor nakabangga ng 75-anyos, inatake sa puso sa presinto
MANILA, Philippines — Idineklarang dead- on-arrival sa ospital ang isang 75-anyos na babae matapos na masalpok ng motorsiklo ng isang Vice Mayor ng Narvacan, Ilocos Sur na namatay din matapos makaramdam ng hirap sa paghinga kamakalawa.
Ang mga nasawi ay sina Vice-Mayor Joseph Tejada, 32, residente ng Brgy. Quinarayan ng naturang bayan at Estelita Gacutan, walang asawa, residente ng naturang lugar.
Batay sa ulat, ay bumibiyahe sa national highway papuntang timog na direksyon habang nakasakay sa Kawasaki 900 CC motorcycle si Tejada nang mabangga nito ang matanda habang tumatawid sa Brgy. Langlangca 2nd, Candon City.
Agad na dinala sa Candon General Hospital ng mga rumespondeng miyembro ng BFP personnel ng Candon City ang matandang babae, subalit idineklarang dead-on-arrival.
Boluntaryo namang sumuko sa Candon City Police Station si Tejada at habang nasa police station ay bigla na lang itong nakaranas ng paninikip ng dibdib kaya’t isinugod sa ospital, subalit idineklarang dead-on-arrival na hinihinalang namatay sa cardiac arrest.
- Latest