4 katao na ilegal na nagtatapon ng basura, timbog
CAMP VICENTE LIM, Laguna, Philippines — Apat katao ang inaresto sa ilegal na pagtatapon ng bulto ng basura sa isang pribadong lote sa Barangay Lambingan, Tanza, Cavite.
Inaresto ng mga otoridad sa aktong nagtatapon ng mga basura ang mga suspek na sina Rolando Macosang, Benjie Beramo, Herman Basan Malayo at Roberto Arugay sa Barangay Lambingan.
Nabigo ang mga suspek na magpakita ng mga dokumento na sila ay pinapayagang magtapon sa nasabing pribadong lupain.
Ayon kay P/Major Dennis Villanueva, Tanza police chief na ang mga trak ng basura ay nagtungo sa lugar upang doon itapon ang mga basura tulad ng mga plastic, diapers, at iba na galing umano sa mga residente sa Silang, Cavite habang ang mga suspek ay mula naman sa Barangay Grace Ville San Del Monte, Bulacan.
Kinasuhan ang mga suspek ng paglabag sa R.A. 9003 o ang ilegal na pagtatapon ng basura sa prosecutor at kasalukuyang nakakulong na.
- Latest