2 suspek sa pag-ambush sa abogado ng Cebu Port, kinasuhan na
MANILA, Philippines — Sinampahan na ng kaso sa Mandaue City Police Office (MCPO) ang dalawang suspek na tumambang sa abogado ng Cebu Port Authority (CPA) at anak nito sa nasabing lungsod nitong Setyembre 1.
Ayon kay Mandaue City Police Office (MCPO) deputy city director for operations Police Lieutenant Colonel Franc Rudolf Oriol, naisampa na nila sa piskalya ang tig-dalawang bilang ng kasong frustrated murder laban sa swimming instructor na si Richard Basalo Delibo, 42, residente ng Sitio Mahogany sa Naga, Cebu at kasabwat nitong hindi pa nakikilala.
Sa tulong ng CCTV, natukoy ang mga suspek bukod pa sa salaysay ng mga nakasaksi sa krimen.
Sinabi ni Oriol na paghihiganti ang motibo ng suspek nang tangkain nilang itumba si Atty. Karen Quinañola-Gonzales, 43, kasama ang 19-anyos nitong anak habang bumabagtas ang mga ito sa kahabaan ng Hernan Cortes St., Barangay Banilad bandang alas-9:00 ng gabi.
Nagalit ito nang maisyuhan siya ng arrest warrant sa estafa case na hawak ni Gonzales.
Nadakip siya sa Metro Manila noong nakaraang taon pero agad nakalaya dahil sa piyansa.
Dahil dito, naapektuhan ang kanyang trabaho pati ang negosyo niya sa swimming classes at wellness training.
- Latest