Buy-bust nauwi sa shootout: Mag-utol na ‘tulak’ sugatan
CAVITE, Philippines — Kapwa sugatan ang magkapatid na drug suspect matapos umanong makipagbarilan sa mga awtoridad sa isinagawang drug bust operation kamakalawa ng gabi sa Brgy. Malagasang 2-D, Imus City.
Kasalukuyan ngayong inoobserbahan sa pagamutan ang mga suspek na nakilalang sina Riuz Tabing Alfiler, 57-anyos at kapatid na si Aladin, 56, kapwa residente ng nasabing lugar.
Sa nakalap na report mula kay P/Sergeant Mark Joseph Jader, may hawak ng kaso, alas-11:00 ng gabi nang ilatag ng mga operatiba ng Drug Enforcement Unit ng Imus City Police ang buy-bust operation kung saan target ang magkapatid.
Habang isinasagawa umano ang drug deal, nakatunog ang mga suspek na pulis ang kanilang katransaksyon kung kaya dito na sila bumunot ng baril at paputukan ang mga pulis na nauwi sa engkuwentro.
Kapwa duguang bumulagta ang mga suspek na agad ring naitakbo sa pagamutan.
Narekober sa mga suspek ang 4-plastic sachet ng shabu na may timbang na 4.30 gramo, buy-bust money at isang caliber 38 revolver na kargado ng mga bala.
- Latest
