9 magkaanak sa Cebu nalason sa kinaing butete; 1 todas

MANILA, Philippines — Isang ginang ang patay habang isinugod naman sa ospital ang walong iba pa matapos  malason sa kinaing pufferfish o butete sa Caubian Island, Lapu-Lapu City nitong Miyerkules.

Bukod sa nasawing ginang, nalason din ang kanyang mister, 4 na anak at 3 apo na may edad 4, 5, at 9-anyos.

Stable naman ang kondisyon ng 8 pas­yente ngunit kailangan umano muna silang obserbahan sa loob ng 24 oras.

Ayon sa medical officer ng Sta. Rosa Community Hospital sa Olango Island na si Dr. Eris Augusto, Miyerkules ng umaga nang kumain ang mag-anak ng butete.

Nakaramdam na lang sila ng panghihina ng katawan at pagkahilo bandang tanghali, partikular na ang ginang na kumain ng lamang loob ng isda.

Paalala ni Augusto sa publiko, iwasan ang pagkain ng butete dahil sa taglay nitong lason.