8 patay sa pag-araro ng dump truck
Batangas, Philippines — Walo katao ang patay matapos araruhin ng rumaragasang dump truck ang isang motorsiklo at kotse sa highway ng Nasugbu Lunes ng umaga.
Kinilala ng Batangas Police ang mga nasawing biktima na sina Eduard Ferrer, driver ng isang motorsiklo at Hipolito Sangalang, ang driver naman ng isang kotse na inararo ng truck.
Kabilang din sa mga nasawi ang mga sakay sa kotse ni Sangalang na sina Amado Santos, 53, Evelyn Santos, 56, Jerson Santos, 26, Jayvee Santos, 24 Catherine Ampo, 24 at isang 4 na buwang babaeng sanggol.
Batay sa report, binabagtas ng dump truck na minamaneho ni Bren Bryan Constantino ang palusong na bahagi ng highway sakop ng Sitio Lodlod, Barangay Aga nang mawalan ito ng kontrol matapos na mag-overtake dakong alas-4:45 ng umaga.
Sa isinagawang imbestigasyon, nawalan umano ng preno ang truck na kargado ng buhangin na patungo sa direksyon ng Nasugbu galing sa Mexico, Pampanga.
Sinagasa rin nito ang isang fruit stand na nasa gilid ng kalsada bago nito madaganan ang motorsiklo at kotse na kasalubong nito sa highway.
Bahagyang nasugatan din ang driver ng cargo truck at ang dalawang pahinante nito.
Batay sa tala ng Nasugbu Police, mula noong 2017, hindi bababa sa 15 katao na ang nasasawi sa mga nangyaring aksidente sa nasabing lugar partikular, sa mga Sitio ng Bukaki, Bayabasan at Lodlod, sakop lahat ng Barangay Aga. - Joy Cantos
- Latest