Lalaki na-bully na, tinepok pa sa suntok
MANILA, Philippines — Isang lalaki ang patay nang suntukin ng umano’y nam-bully sa kanya sa Rodriguez, Rizal kamakalawa ng hapon.
Naisugod pa sa Infirmary Medical Clinic ang biktimang nakilala lang na si Roberto Wycoco ngunit binawian din ng buhay.
Arestado naman ang suspek na si Rosendo Quebada Jr.
Batay sa ulat ng Rodriguez Municipal Police, dakong alas-5:30 ng madaling araw nang maganap ang insidente sa Block 29, Montalban Heights, Brgy. San Jose, Rodriguez.
Nauna rito, binully umano ng suspek ang biktima na nauwi sa kanilang mainitang pagtatalo.
Tinangka pa umanong umiwas ng biktima ngunit sinundan pa ng suspek.
Nang maabutan, dalawang beses pang sinuntok ng suspek ang biktima na tinamaan sa ulo sanhi upang mawalan ng balanse kung kaya’t nabuwal at nabagok.
Isinugod pa ng mga kapitbahay ang biktima sa pagamutan ngunit idineklara ng sumuring doktor na dead-on-arrival.
- Latest
